Cruinneachaidhean Foillsichte
Tha an taisbeanadh seo a’ sealltainn direach cuid de na nithean agus na tasglainn a chaidh a thoirt do Mhuseum & Tasglann nan Eilean bho chionn ghoirid – mòr-chuid dhuibh nach robh air an taisbeanadh cheana.
Nam measg tha na 23 dealbhan a chaidh a thaghadh mar bhuannaichean na Farpais Dhealbhan-camara againn. Chùm sinn an fharpais ann an co-bhonn ris an taisbeanadh Scotland’s Photograph Album a bha air chuairt bho Ghailearaidhean Nàiseanta na h-Alba. A bharrachd air trì duaisean a thoirt seachad anns gach roinn a thaobh aois, thagh na britheamhan 23 dealbh eile a bha air am moladh, agus tha iad uile a-nis air an gabhail a-steach do na cruinneachaidhean maireannach againn. Bha na britheamhan a’ breithneachadh air na cuspairean Daoine, Crùth na Tìre, Ailtireachd agus Coimhearsnachd agus bha iad a’ sireadh dhealbhan a bha ùrail is cruthachail, a bha a’ toirt buaidh, a bha air an deagh chur ri chèile agus a bha a’ sealltainn comasan teicnigeach.
Coltach ri gach taigh-tasgaidh agus tasglann, chan urrainn dhuinn ach àireamh bheag de na nithean a th’ anns na cruinneachaidhean againn a thaisbeanadh aig àm sam bith. Tha a’ mhòr-chuid de na cruinneachaidhean air an cumail anns na stòir againn ann a Steòrnabhagh agus ann am Beinn na Faoghla. Tha iad air an cleachdadh airson rannsachadh, taisbeanaidhean sealach agus foillseachadh air-loidhne.
Tron ghlasadh a bh’ ann ri linn mòr-ghalar Covid chaidh againn air ùine a chur seachd sna stòir, a’ togail dhealbhan, a’ clàradh agus a’ cruthachadh chatalogan. Tha taghadh de na nithean a chaidh a chlàradh anns an taisbeanadh-slaighd air an telebhisean.
Tha e cudromach gum bi na cruinneachaidhean aig an taigh-tasgaidh agus an tasglann mar sgàthan air gach taobh de bheatha nan eilean an-diugh agus san àm a dh’fhalbh. Ma tha thu a’ smaoineachadh gu bheil càil agadsa anns am faodadh ùidh a bhith againne, agus gur dòcha gun tugadh tu dhuinn e, leig fios thugainn agus bheir sinn dhut na slatan-tomhais a tha sinn a’ cleachdadh airson nithean a chur ris na cruinneachaidhean againn.
Taing do Mhaoin Dualchais a’ Chrannchuir Nàiseanta a leig dhuinn an Fharpais Dhealbh-camara a mhaoineachadh.
Taing shònraichte don h-uile duine a thug nithean do Mhuseum & Tasglann nan Eilean bho chionn ghoirid.
